早前都講過，根據建制派早前嘅計劃，下屆立法會財務委員會主席之位，唔會畀富貴黨Tommy張宇人連任，但同時Tommy亦多次公開表明自己唔想做，諗住好落台。點知近日佢突然開聲話要同梁君彥爭做內務委員會主席，令建制派都非常錯愕，覺得佢係為咗冇得做財委會主席而報復。直到尋日，Tommy又再發炮，竟然暗批建制派「一堆人霸晒」所有委員會主席位，唔通佢忘記自己一直係建制派一員？

張宇人尋日暗批建制派「一堆人霸晒」所有委員會主席位。（資料圖片）

Tommy話就算七十名議員有不同政見，都可以各司其職，強調「一堆人霸晒」所有委員會主席位，咁樣做對大家都冇好處，市民都唔覺得係好事，如果唔學識妥協，對大家留有空間，議會好難有效率。Tommy提到各司其職都係好事，但奇怪點解過去一直唔覺佢有咁講嘅？今次為咗爭做內會主席搞到要掉轉槍頭指住建制派，仲話要爭取泛民主派支持，唔知仲以為佢係泛民主派一分子添！

第一手消息請下載on.cc東網iPhone/iPad/Android/Windows Phone Apps