十八區一億元重點工程項目搞咗咁耐，一直拖拖拉拉，好似觀塘音樂噴泉發展項目，雖然已獲立法會民政事務委員會通過，但仲要過埋財務委員會嗰關。呢個項目都要斥資五千幾萬元，造價亦受到市民批評，認為係浪費公帑、不切實際。觀塘區議員黃春平話，其實音樂噴泉項目都係順應民意而爭取，因為早前「十大建設評選」，音樂噴泉就喺十五個項目之中排行第五。

觀塘區議會為音樂噴泉發展項目造勢。

不過，黃春平透露，其實五千幾萬元只係音樂噴泉嘅初步技術造價，咁埋單計數咪不得了？如果工程延誤超支又點算呢？黃春平就笑笑口話，呢方面就要睇立法會財委會通唔通過嘞！同場仲有觀塘區議會主席陳振彬，佢致詞時就話希望在場嘅發展局局長陳茂波可以繼續堅持，將民意帶番去畀其他政府部門。咁多方出招，莫非想畀壓力財委會盡快通過撥款？

第一手消息請下載on.cc東網iPhone/iPad/Android/Windows Phone Apps