喺近呢幾個月,本港零售市道疲弱,唔少商舖都叫苦連天,不斷諗計救亡,但政府似乎仲喺度懶懶閒,唔覺有乜嘢救市招數,亦都冇乜嘢大舉宣傳香港旅遊業。行政會議成員兼立法會議員葉劉淑儀都忍唔住話,香港唔應該好似個人遊年代咁,靠內地旅遊政策,將啲旅客送到你門口,政府亦唔可以貪方便,度度都起購物城,狠批「唔通真係飯來張口」?

一味諗購物城欠變通

葉劉尋日接受電台訪問時話,香港年輕人要明白,過去成功係靠開放,希望年輕人努力走出去,話唔可以好似個人遊年代咁,靠內地嘅旅遊政策,將啲旅客送到你門口,風光幾年後,依家好事變成壞事,引起社會摩擦,「你唔鍾意人嚟,我咪唔嚟囉」,旅客減少,香港又開始驚。

佢又話新加坡都冇呢啲條件,唔會成日有旅客咁近到訪,要靠大量投資吸引旅客,又大讚獅城有遠見同危機感,唔會只係睇自己小小一塊田,反而態度進取,表現好過香港,除經營東盟市場外,亦爭取同內地合作,不斷加大投資額,又會做海外考察,搶其他地區生意,而香港就應該跟住國家嘅一帶一路走出去。

以葉劉咁講,香港咁多人才,點解唔搞啲新嘢?仲質疑係咪應該搞購物城咁低增值,繼續去賣奶粉同洗頭水?加上機場北又打算起個購物城,批評香港唔應該貪方便,度度都係購物城,「唔通真係飯來張口?香港要努力啲至得」。睇嚟葉劉呢句「努力啲」,都係送畀財爺「鬍鬚曾」曾俊華,要佢諗吓新計救市先得,唔好坐喺度等出糧啦!

第一手消息請下載on.cc東網iPhone/iPad/Android/Windows Phone Apps