觀塘裕民坊進行重建工程，致鼠患大擴散，四散至遠離地盤的月華街、協和街及物華街等，有居民更被老鼠咬傷，李衞睇唔過眼，搵食環署署長群群質問。

李衞：鼠患咁嚴重，點解唔做嘢？

群群：點敢唔做，之前咪有滅鼠運動囉！

李衞：得嗰一次，做騷咩，有鬼用。

群群：唔好講笑，捉咗成三百幾隻老鼠o架！

李衞：你都知多呢，應該大規模撲滅先啱！

群群：死鼠就易捉啫，活鼠就麻煩……

李衞：係過街老鼠就要捉啦，邊可以分死唔死，應該捉咗你添呀。

群群：捉我？

李衞：滅鼠不力，令居民飽受鼠患之苦，仲唔係乞人憎，正宗「過街老鼠」？捉你落台先至啱！

群群：$^@##@@*##!!其實老鼠都好可愛吖！

第一手消息請下載on.cc東網iPhone/iPad/Android/Windows Phone Apps