政壇：陳克勤讚學生扮官「星」味濃
建造業議會同香港綠色建築議會尋日舉辦模擬立法會辯論，由四十五位中學生扮演議員、立法會主席同官員，辯論將綠建環評加入賣地條款。而全場焦點就落喺扮環境局局長嘅同學身上，事關佢「耍太極」出色，連真正嘅環境局局長黃錦星（星星）都拎出手機影呢位扮演者添！
黃錦星（箭嘴示）出席模擬立法會，難得咁輕鬆。
尋日扮演議員同官員嘅學生準備都算充足，演員扮立法會主席，亦學得似模似樣，除咗指摘議員高舉示威標語阻擋視線，又會提醒議員發言毋須彎腰遷就咪高峰。不過評判之一嘅立法會議員陳克勤最欣賞模擬環境局局長嘅學生，因為佢講嘢夠晒官腔，入型入格，仲暗寸話扮演者嘅講稿係由星星提供喎！克勤又話，現時官員好似倒模一樣，唔夠驚喜，若果官員唔多加努力，遲早畀中學生追過咁話。
