政壇：搞搞政：港大生人勿近 首副走夾唔抖

泛民謀「司法覆核」攪局

不過，據聞泛民仲未肯收手，計劃喺校委會否決港大法律學院前院長陳文敏升任副校長後，提出司法覆核挑戰校方，據講呢個狙擊行動嘅其中一招，係就校委會嘅處事程序，或者校方嘅佔中捐款醜聞調查報告結論提出司法覆核。事實上，港大法律學院副教授兼佔中發起人戴耀廷和陳文敏本人，都講過不排除親自就事件提出司法覆核，校委會同港大繼續不得安寧都似。

咁政治化嘅爭鬥，難怪消息透露，首副嘅四名遴選申請人全部言退，泛民指摘港大校委會卸鑊等埋首副，嚇親人，反對陳文敏上位嘅人就歸咎泛民粗暴干預港大自主、學生及激進人士武力衝擊校委會，先係首副人選先後退選嘅主因。總之就繼續各說各話，互數不是。如果遲吓又有司法訴訟跟尾，港大內部鬥餐死嘅情況有排都收唔到科。