政壇：內會選主席 建制混戰
立法會下個月先復會，但各事務委員會正副主席嘅爭奪戰，已隨着自由黨飲食界議員張宇人揚言爭做內會主席而提早展開。其實建制派之前已經協調好，今屆最後一個立法會會期嘅正副人選安排，而內會主席原定係由梁君彥續任，自由黨今次唔理協調爭位，已經引起一場大混戰，但獨立議員謝偉俊（Paul）尋日就另提新議，對台前爭位嘅兩人未投信任一票，反而要撐建仔嘅譚耀宗（譚sir）做內會主席喎，呢次真係七國咁亂囉。
撐譚sir出任
以往爭奪各大委員會嘅正副主席之位，建制派若採用人海戰術，大包圍基本上不成問題。今次內會主席混戰情況就有啲特殊，事關自由黨唔理協調，如果該黨五票同泛民二十七票合流，梁君彥未必坐得穩內會主席個位，所以雙方一票都不能少，獨立議員嗰幾票尤為關鍵。
問到Paul點睇呢次內會主席之爭，佢話建制派下月初會開會傾，自己暫時未有心水人選，因為張宇人同梁君彥都各有優缺點，前者善於掌握會議氣氛，有時自嘲吓，紓緩緊張氣氛；後者就要改善同泛民嘅關係。Paul又話，為免大家爭崩頭傷和氣，佢心目中有第三人選，就係建仔前主席譚sir，原因係大部分人都唔會反對由佢做；其次係有傳譚sir將會做下屆立法會主席，做定內會主席可以熱吓身先喎。
雖然Paul呢個提議係想平息紛爭，但可行性就好低。因為係譚sir做開政制事務委員會主席，如果貿然抽走咗佢，變相又要搵另一個人頂替，所謂牽一髮動全身，到時可能仲麻煩。另外，如果一如傳聞所言，下屆立法會主席由譚sir做，即係大會、內會主席都由民建聯包攬，唔合乎政治倫理，到時群情洶湧，就真係攞嚟搞。
