平等機會委員會主席嘅遴選過程一直被民間團體鬧爆係黑箱作業，政府兩年半前「翻閹」人稱「廢鑊」嘅食物及衞生局前局長「周一鑊」周一嶽出任平機會主席，唔止無助推廣平等機會同消除歧視，反而進一步深化平機會係「高官退休俱樂部」嘅形象。眼見周一鑊任內劣迹斑斑，政府終於知衰「補鑊」，前日突然高調宣布公開招聘下任平機會主席。其實年終有眾多高官退休，要搵人接手根本唔成問題，仲好過周一鑊多多聲，最緊要係唔再佗衰平機會。

鄧國威 黃靜文 黎年 皆合適

周一鑊掌管本港醫療衞生及食物安全政策時屢爆失誤，前年獲「翻閹」為平機會主席，月薪高至逾二十六萬元，但佢主導下推出嘅政策爭議不絕，佢亦多次被批評立場偏頗，甚至「踩界」撐同志，真係搞到天怒人怨。其實政府要搵人接手平機會主席一職根本不成問題，單係前高官，最新鮮滾熱辣嘅有公務員事務局前局長鄧國威，佢離職後接受電台訪問時曾自爆，原本打算做到一七年，相信有掌管十七萬公務員經驗嘅佢，做平機會主席仲係有心有力。

政制及內地事務局前副局長黃靜文亦係另一合適人選。據聞上次遴選平機會主席時，曾有獵頭公司向佢招手，當時佢以自己太熟悉政府運作為由婉拒。其實佢擔任副局長時主責人權事宜，包括反歧視條例，期間同平機會有唔少接觸；加上佢做過一年幾廠商會行政總裁，有高層管理經驗之餘，「過冷河」時間亦夠晒。

此外，舊年三月底離任申訴專員嘅黎年，亦有可能接掌平機會。黎年喺官場縱橫四十年，喺多個政府決策局同部門工作，包括九九年擔任廉政專員，之後返政府擔任財經事務及庫務局常任秘書長，至○七年退休；到○九年重出江湖任申訴專員，公共行政經驗相當豐富。講到底，平機會主席嘅合適人選大有人在，「叮走」周一鑊真係百利而無一害，一天都光晒！

第一手消息請下載on.cc東網iPhone/iPad/Android/Windows Phone Apps