香港土地供應緊絀，連劃建康體設施嘅用地都嚴重不足，去年《施政報告》提出「活化已修復堆填區資助計劃」，設立十億元資助非牟利團體或體育總會，發展已修復嘅堆填區作康樂設施等公共用途。首批供申請嘅三幅用地為觀塘區馬游塘中、屯門區望后石谷同將軍澳第一期堆填區，成功申請項目可獲上限一億元資助。環保署話首批用地有望一個月內可公開申請。呢項計劃對市民固然有利，但該署署長王倩儀審批時咪掉以輕心，要小心評估團體嘅財政同管理能力，以防善用公地變公地私用。
