政壇：熟女結婚做人辦 葉劉不搵第二春
唔少事業女性忙於工作，要搵個伴侶都好困難，可能要參加交友會先有機會搵到另一半。新民黨立法會議員葉劉淑儀就喺社交網站上自爆，打算參加交友會，莫非佢想搵第二春？
葉劉淑儀獲新黨友邀請，擔任交友會嘅主講嘉賓之一。 （資料圖片）
原來葉劉係獲有「鑽石媒人」之稱嘅新黨友Mei Ling吳美玲邀請，喺明年二月將近情人節時，出席亞洲單身貴族交友會「小緣圈博覽」，仲會擔任座談會嘅其中一位主講嘉賓添！講番呢位Mei Ling，就係曾經幫電視「盛女」真人騷做顧問嗰位嘞！
但葉劉話自己太忙，獨身咗十八年亦慣晒，唔打算搵個伴嘞，但就話本身係「熟女結婚」嘅好樣辦。佢話當年唔少人都早婚，佢就三十一歲先結婚，丈夫亦係經親人介紹，而現代人做嘢咁忙，好難識到工作圈以外嘅人，有人介紹吓都唔錯喎。葉劉仲贈貼士畀一眾熟女，就係最緊要記住，你揀人、人揀你，態度要實際啲。
