政壇：怕咗范國威 黨友劈炮
喺政圈內一直有傳新民主同盟立法會議員范國威為人小器又攬權，搞到啲黨友都驚咗佢。尋日終於有黨友頂佢唔順要退出！沙田區議員容溟舟喺退黨信上表明自己喺黨內作用漸細，加上地區工作繁重，無暇兼顧黨務，惟有退出。雖然容溟舟表面上就話退黨係因為地區工作繁重，但知情人士透露佢退黨係因為「太上皇」范國威玩針對，結果咪憤而退黨囉。
拒評前黨友指控
其實，冰封三尺非一日之寒，據知范國威同容溟舟交惡都唔係呢一兩日嘅事。早在幾年前，范國威一次因為助手出錯，而怒炒助手，容溟舟就偏偏收留被炒嘅助手，令范國威覺得容溟舟事事對着幹，之後就削減容嘅資源，唔畀容同佢「孖公仔」一齊掛橫額。
此外，范國威仲發揮「太上皇」本色，由於范國威身為立法會議員，手握黨內經濟大權，其他執委惟有順應佢意思。而喺上周四嘅執委會會議中，執委再次討論容嘅參選申請，「太上皇」再次發功，執委就以四票贊成、六票反對同兩票棄權，否決容以新同盟名義參與區議會選舉，由於容一直希望繼續地區工作，故退黨參選。對於容溟舟嘅批評，范國威就話再冇補充。
政治一日都嫌長，正所謂合則來、不合則去，喺政圈離離合合都係經常發生嘅事，正如當年匯點同港同盟合併成立白鴿黨，而身兼匯點核心成員嘅狄志遠喺日前都退咗黨，準備再組織另一個團體繼續參政；仲記得范國威早年係白鴿黨改革派，曾撰文批評黨內嘅《大佬文化千秋萬世》，埋怨得唔到主流派嘅重視，憤而退黨再組成新同盟。由此可見，既然路線同政見都唔啱嘴形咯，就無謂勉強喇！
