城中鏡：減持數碼通 黎大鈞講心唔講金
數碼通前總裁黎大鈞上月底離職前，講過「走就係走、放手就放晒」，幾咁唔拖泥帶水，唔通連持股都一樣style？港交所股權披露資料顯示，黎大鈞八月三十一日申報持股由0.72%大幅跌至0.05%，「減持」睇落似係因為佢未有行使值過億元嘅Options（購股權）。
黎大鈞八月三十一日申報持股由0.72%大幅跌至0.05% （資料圖片）
睇番兩份上周五嘅申報，黎大鈞喺八月三十一日曾以每股行使價12.78元購股權，獲得50萬股數碼通；仲有另外714.5萬股，尋日收市價計，值成1.04億元，就喺無任何作價情況下申報為「減持」。睇番年報，呢批「減持」，咁啱就係佢二○一一年所獲購股權嘅餘下部分。
黎大鈞喺六、七月時有行使過購股權，股份仲即時賣走，帳面賺超過一百八十九萬元。但今次睇嚟，佢似乎無把握最後機會行使所有購股權，究竟佢係同公司「講心唔講金」？定係點呢可？
