城中鏡：笑談普通話
日前俗稱「中港大戰」嘅中國足球隊同香港足球隊嘅比賽零比零和氣收場，事後卻爆出港隊門將葉鴻輝聲稱被國足隊隊長鄭智辱罵為「狗」嘅風波，由此引申港人普通話水平嘅討論，而咪以為政商界人士不時穿梭中港兩地，無論講同聽普通話，都得心應手，其實都試過因中港文化唔同，出現唔少尷尬場面，好似中華總商會會長楊釗，以前到內地酒樓或酒店時，稱呼女侍應為「小姐」，事後先知「小姐」呢個稱呼，會令人誤會係從事色情事業嘅女士。
曾智明（左）分享講客家話嘅笑話，旁為張俊勇。
陳光明話除非要兌換成其他貨幣，否則人民幣貶值影響不大。
楊釗曾以「小姐」稱呼內地酒樓女侍應，事後先知或會引起誤會。
客家話「鯇丸湯」似「搵人劏」
中華總商會尋日舉行周年會員大會，中港大戰後爆出辱罵風波，自然係討論話題之一，其中篤信佛教嘅楊釗語重心長話多個朋友總好過多個敵人，加上中港兩地或多或少有文化差異，言語上嘅誤會有時難以避免，因此毋須介意太多或太上心，佢其後更不惜以自己為例子，自爆過去冇乜特別留意個別內地用語，要其他人近年提醒，先知悉並注意。
涉及普通話或家鄉話嘅笑話同尷尬場面，真係十常八九，同場嘅中總副會長曾智明形容，普通話有好多唔同嘅口音，好多時都會有類似笑話出現，好似佢哋客家人就好鍾意食俗稱「鯇丸湯」嘅鯇魚丸湯，用客家話講嘅讀音就好似廣東話「搵人劏」三個音，所以有時佢同朋友打麻雀時，食鯇丸湯就會笑住話要「搵人劏、搵人劏」喇！
轉頭見到中總常務會董方文雄、選任會董蔡關穎琴、陳光明、張俊勇等人，講開人民幣最近貶值，本身喺內地有投資生意嘅陳光明相信，如果於內地賺錢後，喺當地使用，相信影響不大，除非要兌換成其他貨幣喎。
