內地股市尋日放完長假後復市，仲諗住股市會唔會收復失地，點知有業界人士報料，話有個別內地券商嘅深圳分行，尋日竟然有九成經紀冇返工，繼續放假！
點解嘅？一字咁淺，佢哋啲客輸到冇晒水（錢）！與其冇客坐冷板櫈，冇生意做，索性Long Vacation。睇嚟，內地股市情況都真係相當嚴峻。
咁多經紀唔返工，難怪尋日內地股市成交勁低，滬深兩市夾埋成交，都只係得六千幾億元人仔，創出半年新低。除咗前線經紀外，聽聞內地嘅券商研究部，都受今次A股冧市影響，分析員少咗出研究報告，費事「寫乜衰乜」，累客仔輸錢就唔好。
業界人士話呢個境況只有幾個字可以形容：真係悶到冇朋友！不過，暫時未聽聞內地券商有裁員潮。
第一手消息請下載on.cc東網
