政壇：馬斐森放笑彈 冧牙醫老婆
香港大學牙醫學院早前獲QS全球大學學科排名報告評為全球第二，尋日舉行酒會慶祝，港大校長馬斐森、校務委員會主席「金刀梁」梁智鴻、食物及衞生局局長高永文等人當然畀足面到場。尋晚酒會以「share a smile（分享微笑）」為主題，一班嘉賓亦大放笑彈，馬斐森就分享「親身經歷」。
馬斐森（右）公然氹老婆，唔知老婆係咪甜到入心呢？（資料圖片）
馬斐森話喺人生中做咗一個最啱決定，就係娶咗一個做牙醫嘅老婆，唔知係咪因為佢太太都在現場，所以口甜舌滑一啲呢？金刀梁就抽港大「水」，話港大近期發生好多嘢，不過最大件事就點都係水，相信佢係講緊鉛水風波喇！
金刀梁台下又被問及月底校委會傾學術人事及資源副校長委任，佢證實馬斐森喺二十九號有事缺席例會，所以要另覓日子喎。
