政壇：金句王李小加 開口有「火」
港交所行政總裁李小加一向係金句王，佢用得至多嘅，係堪稱修辭第一大法嘅「譬喻」，乜金融嘢，經佢口一講，即刻明晒。小加總裁嘅金句多到可以做「譬喻教室」，以前佢鍾意用「水」、「水管」嚟做譬喻，但發現最近佢開口埋口都講「救火」，唔通有啲嘢燒到埋身？
最近小加少咗講「水」，開口埋口都講「火」，好似上個月底內地亞布力中國企業家論壇，好多人批評中央「暴力救市」攪亂規矩，小加即刻話屋企火燭，救火要緊，仲理得姿勢？
話口未完，只係隔咗一個星期，佢尋日喺新加坡一個商品論壇上，又再去講「火」。
今次講到中港股市「互聯互通」好似冇晒聲氣，小加就話場火剛啱撲熄，係都冷靜吓，睇點清理現場，點會即刻傾買新梳化、新窗簾！嗱嗱嗱，開口埋口都講「救火」，係心裏有團火？
