近排好多假冒速遞公司、銀行同金管局等名義發出短訊嘅電話騙案，真係防不勝防。市民對來歷不明嘅電話都提高警覺，好似近日就連警方發出嘅手機短訊，提醒市民要慎防受騙，以至選舉事務處發出嘅短訊中，提供一個網頁連結，要求相關人士登入選舉事務處網頁查閱選民登記資料，市民都懷疑係騙徒所為，目的係想套取個人資料，搞到要急急發新聞稿澄清。話口未完，有市民又發現疑似電話騙案喎，今次仲牽涉到旅遊業議會（TIC）同工聯會嘅立法會議員鄧家彪添！
本報收到讀者報料，話近日收到手機短訊，內容指TIC應鄧家彪議員的要求，進行一個有關旅行團領隊收入嘅調查，仲叫人開啟自己個電郵填寫問卷。由於最近電騙手法層出不窮，旅議會做調查竟要擺個議員上枱，而且涉及自己嘅收入狀況，令人更加生疑，擔心一開電郵就會中招。
免招他人非議
不過，旅議會總幹事董耀中接受本報查詢時，就證實有關短訊的而且確係由佢哋發出，並唔係電話騙案。至於點解要擺鄧家彪上枱，董耀中指鄧家彪早前同過旅遊事務專員開會，提出本港領隊收入唔穩定，要求進行相關調查，旅議會諮詢私隱專員意見之後，決定抽樣發短訊畀全港領隊，由佢哋自行決定係咪回覆問卷。
有業界人士就指出，旅議會今次擺鄧家彪上枱，可能係為免被指益自己友。尤其仲有一年就係立法會換屆選舉，旅議會為領隊收入做民調，好容易會被人質疑想籠絡人心、曲線拉票，因此先要講清講楚係應立法會議員要求進行有關調查，費事惹人誤解，誰知竟然又引起咗另一場誤會。
第一手消息請下載on.cc東網
