城中鏡：陳繁昌獻唱迎新
各大專院校嘅迎新營都進行得七七八八，仲記得每年嘅大學迎新營，部分內容都會引起爭議，適逢尋日係新一季馬季開鑼，撞到香港科技大學校長陳繁昌，佢面帶笑容力撐自己嘅學生一向都咁乖，又透露今年參加科大迎新營時將會表演唱歌！另一邊廂，港大學術、人事及資源副校長任命風波最近滿城風雨，同場現身嘅港大校務委員會主席梁智鴻仍然氣定神閒，相信一眾校委會以港大利益為依歸作決定。
陳繁昌透露將於迎新營表演唱歌。
劉燊濤（左）同太太吳奕筠大談健康心得。
周永健期望今年投注額與舊年相若。
新一季馬季喺沙田馬場開鑼，好多名人入場湊熱鬧，其中少入馬場嘅陳繁昌，講開今年科大迎新營就眉飛色舞，因佢將會表演唱歌，而且唔講唔知，佢讀中學時已有唱開民歌，仲會拎埋結他自彈自唱，但佢笑言，今次於迎新營只會齋唱，彈結他留番下次。
劉燊濤泰拳健體
同場仲有工業總會名譽會長劉展灝嘅兒子、飛騰錶業品牌經理Gary劉燊濤，講及自己嘅健康心得，佢自言打咗泰拳一段時間，覺得身體健康咗；當問及有冇打算挑戰自己上擂台，Gary即時望住身旁嘅太太吳奕筠，話唔會考慮住，免得太太同家人擔心，反而會等小朋友大個啲，睇吓佢哋有無興趣玩吓咁話。
馬會一批大董亦有現身支持馬季開鑼日，其中馬會副主席周永健知悉今年整體經濟情況一般，加上受多種因素影響下，佢期望今年投注額可以同舊年相若，就已經很滿意。
