每周寫網誌係財爺「鬍鬚曾」曾俊華嘅指定動作，而喺尋日發表嘅最新一期網誌，終於冇再擦鞋大談「一帶一路」，亦無講到香港市民最關心嘅樓、股、匯市變動，轉為講體育，連抽兩位香港傑出運動員嘅水。第一個被抽水嘅，係外號「神奇小子」嘅拳手曹星如，自爆對方完成十八場拳賽連勝嘅創舉時，佢都有到場打氣。佢又話事後有網友喺fb提議佢用洪拳同曹星如嘅西洋拳打番場，佢笑言呢個係「虐老」嘅提議，直言今日身體質素大不如前，技術亦已生疏，莫講話打一場，要佢捱曹星如一拳，後果都可能不堪設想。
佢之後轉為大談日前嘅中港足球大戰。話喺執筆之時，港隊於世界盃外圍賽對中國隊嘅賽事取得寶貴一分，其中港隊門將葉鴻輝表現神勇，不負「英雄輝」之名。又話港隊喺明晚主場迎戰強隊卡塔爾，無論勝負如何，都希望大家全力以赴，踢場好波，同現場球迷一齊向世界展示港人嘅優秀質素同風格。
不過，對於有香港球迷喺早前嘅港隊主場賽事噓國歌，惹來國際足協來信要求香港足總關注；中國足協喺官方海報中，用「有黑皮膚、黃皮膚、白皮膚，這麼『有層次』的球隊」嚟形容香港隊，被指種族歧視之嫌；以至葉鴻輝喺中港大戰賽後，聲稱曾被鄭智辱罵為「狗」嘅風波，鬍鬚曾就隻字不提，相信係避免抽水抽着火水，最後燒親自己。
第一手消息請下載on.cc東網
