政壇：徐英偉fb相 暗撐郭振華
十一月下旬舉行區議會換屆選舉，除咗泛民主派同傘兵喺多區互撼，建制派喺多個選區亦未能成功協調，其中一個焦點選區係深水埗又一村。之前有消息話當區現任區議員、身兼深水埗區議會主席嘅郭振華會棄選，讓位畀富貴黨青年團主席李梓敬，同社民連嘅周嘉發一對一決戰，但其後又有澄清指郭仍未言退。民政事務局政治助理徐英偉，近日就喺社交網站上載兩個囝囝同郭振華嘅合照，令人聯想徐英偉係咪暗撐郭振華繼續參選連任，同政府一向唔咬弦嘅富貴黨撼過。
上圖：徐英偉喺fb上載兩個囝囝同郭振華（右）嘅合照，大有暗撐對方連任之意。（互聯網圖片）
徐英偉
其實徐英偉本身都係又一村居民，佢日前上載嗰兩張相片，顯示兩個囝囝喺郭振華手上接過「全城清潔2015」嘅紀念品，似乎係宣傳全城清潔多過支持郭參選。但有地區消息指，郭振華根本無退意，早前有人傳佢棄選可能只係煙幕，故今次呢張合照亦多少有闢謠之用。究竟最後郭振華同李梓敬邊個會被勸退，定係兩人都堅持參選，由泛民坐收漁人之利，相信好快就會揭曉。
