侯志強右手一條黃立叾(魚倉)，左手一條海虎斑，仲自言識得用腦電波同鯊魚溝通。（受訪者提供圖片）
之前都講過，上水鄉事委員會主席侯志強可以話係野生動物嘅剋星，除咗試過徒手捉蛇同打野豬，原來佢仲不時會去潛水打魚。早前佢就由沙頭角揸船去塔門，瞓一晚後喺天光潛水打魚，打咗成八、九條大魚，加埋百幾斤！圖中就見佢右手一條黃立（魚倉），左手一條海虎斑。
侯志強又教路話，試過有次捉魚遇上鯊魚，好彩佢夠鎮定，用腦電波同對方講：「大海咁多美食，唔一定要揀我吖？」結果條鯊魚真係掉頭走咗。不過，佢最後都補充多一句，話遇到鯊魚最緊要都係手執魚槍，保護自己。
講完威水史又要講吓瘀事，佢話試過喺馬來西亞畀人氹佢用近二萬蚊港幣，買咗條名為「忘不了」嘅魚，結果食落陣味同鯇魚冇乜分別，認真搵笨！呢個經歷令佢至今都忘不了。
第一手消息請下載on.cc東網
