政壇：阿Dick寸白鴿 路線搖擺內傷

包括白鴿黨等泛民主派政黨喺六一八政改方案表決時企硬否決政改方案，外界以為中央同泛民關係陷入冰封，殊不知早前國務院港澳辦副主任馮巍南下香港同白鴿黨領導層會面，打開「後政改」嘅溝通之門。白鴿黨前副主席Dick狄志遠接受電視台訪問時，寸爆白鴿黨路線搖擺，指由一○年政改願意溝通，到早前政改方案傾都唔傾，轉而今日又跳出嚟溝通，惹來黨內俗稱「乳鴿」嘅不滿，佢直言一切都係黨嘅路線搖擺造成內傷。其實被視為溫和派嘅阿Dick，擬退黨前夕都要再次痛斥白鴿黨不是，白鴿黨如果繼續畀人感覺一時一樣，更多溫和派成員出走係遲早嘅事。