政壇：蔡敏思食早餐 最緊要有飯氣
香港人生活節奏好快，早餐亦變得簡單西化，依家仍然保留早餐食米飯嘅人，已經買少見少。做健身美容生意嘅潮屬社團總會會董蔡敏思（Mence）就夠晒特別，佢二十幾年前因為身子弱，改食豐富嘅飯餸做早餐，朝朝食得飽飽又營養，精神果然好啲，自此就一直維持呢個習慣。
蔡敏思早餐竟然係食豐富嘅飯餸。
早前Mence帶女兒到澳洲玩，估唔到最唔慣嘅竟然係早餐冇飯食，真係搞笑。Mence返港後又忙個不停，除咗為自己盤生意引入新服務之外，亦積極投身公益。早前「香港潮汕客屬聯誼總會」成立，匯聚出晒名團結嘅潮州人及客家人，Mence就擔旗做慈善部門負責人，度橋為社會送暖。
