政壇：湯文亮打波叻 囡囡甘拜下風
因「細價樓爆煲論」而人氣急升嘅紀惠集團行政總裁湯文亮早前輸咗牙骹，因樓價不跌反升，而喺灣仔一間富豪飯堂請客認輸。當晚投資界高手雲集唔使講，而一班體育界新星亦係座上客，包括年僅十八歲嘅香港女子青年跳遠紀錄保持者陳家倩，睇嚟身兼灣仔體育總會會長嘅湯文亮確好支持體育。
湯文亮（右二）支持體育，陳家倩（左二）、何佩犀（右一）及廖志強係飯局座上客。
湯振玲
湯文亮自言鍾意運動，最愛羽毛球及壁球。佢嘅女兒仁濟醫院總理湯振玲（Jacqueline）就笑稱早幾日先同爸爸砌波，全家人都唔夠佢打喎！當晚湯文亮太太、兒子湯振傑夫婦都有到場，仲有位斯文男士傍住Jacqueline，Jacqueline笑笑口承認係男友Charles。
當晚體育界人士仲有灣仔體育總會執委兼義務秘書何佩犀、執委廖志強及甲組足球隊灣仔隊一班球員都有到場。曾經係香港撐竿跳高紀錄保持者嘅廖志強，現時係陳家倩嘅教練，佢對家倩嘅前景十分睇好。
