十一月嘅區議會選舉係佔領行動後首個大型選舉，雨傘勢力發起「傘兵」落區搶位，喺東區鯉景灣連任多屆嘅區議員傅元章就好大機會畀工黨律師王學今狙擊。但近日東區區議會一個行動，就惹來地區人士質疑，事關政府突然向東區區議會提交有關興建鯉景灣綜合大樓嘅設計方案，被疑係政府幫當區議員競逐連任嘅其中一項政績工程。
事件涉及西灣河東區裁判法院毗鄰一幅政府、機構及社區用地，空置多年作臨時停車場。但政府早喺一二年二月，已向區議會轄下小組會建議興建鯉景灣綜合大樓，包括一間分區圖書館及一間社署安老院，同年三月獲委員會支持，但拖足三年半，直至今年八月先見設計方案，因而被地區人士質疑時間湊巧，臨近區議會選舉先有方案。而且有關綜合大樓位處鯉景灣選區，客觀效果是為當區區議員傅元章競逐連任助選。
傅元章表示，這幅土地由填海至今二十五年都未有發展，同時佢爭取興建圖書館好多年，根本同選舉無關。對於是否存在政府為建制派助選，相信存有灰色地帶，但愈近選舉，看來這些爭議只會有增無減。至於有意參選的王學今，其實都在政壇游走多年，曾經入過前綫、社民連，○三、○四及○七年參選過區議會選舉及補選都敗北。
第一手消息請下載on.cc東網
