區議會委任制下屆將壽終正寢，有地區人士報料話灣仔委任區議員龐朝輝近排頻頻喺渣甸山附近出沒，似乎有意為直選鋪路。如果佢真係落戶渣甸山選區，將會係區議會史上首次有一家三口都曾喺同一選區參選。
本身係眼科醫生嘅龐朝輝生於醫護世家，佢媽媽係護士兼前灣仔區議員龐曹聖玉，爸爸就係牙醫龐可榮。○三年區議會選舉時，時任渣甸山選區區議員嘅龐太打算將議席讓畀丈夫，惟最終慘敗畀建築師陳耀輝，兩年後，其妻淡出政圈，但個仔龐朝輝就愈來愈活躍，仲傳出有意出選渣甸山選區添。不過，龐朝輝黨友就否認，佢話龐朝輝身兼醫生及校董，工作已分身不暇，而且佢志不在小選區，暫時無意參選喎。
咁點解佢頻頻在渣甸山附近出沒呢？其黨友指自由黨青年團副主席林偉文兩三年前開始在渣甸山服務，龐朝輝作為師傅，不時陪徒弟落區亦理所當然。但龐朝輝未做過民選區議員，未經過選舉洗禮，都算係師傅？
第一手消息請下載on.cc東網
