政壇：做希臘島主 葉振南心思思
香港買乜都貴，最貴係物業，而向海嘅物業更係千金難求。近年，唔少港人為得心頭好，不惜隔洋置業，汕頭商會會長葉振南（Stephen）都一度心思思，事關佢嘅好友曾經撩佢買個擁有愛琴海美景嘅希臘島仔做島主，據講，當地一個七十萬呎嘅島嶼叫價只係六百至七百萬港元，仲平過香港一般中小型住宅單位喎。
成個島都咁平，皆因陷入財困嘅希臘前景未明，脫歐風險唔小，經濟更有排難復甦，而且，希臘大大小小島嶼多達二千多個，呢啲小島擁有權本來世代相傳，公開放售者少之有少。不過財政危機打擊下，當地政府開始徵收土地稅，所以唔少島主才被迫走上賣島套現呢條路。
咁Stephen動心未呢？佢話，自己做開紅酒生意嘅拍檔係希臘人，熟晒地頭，早前提議佢趁平買個島玩吓。不過隔山買島始終令Stephen唔多放心，而且喺當地生活都要識啲希臘文，個島又荒蕪一片，無配套設施，就算畀個島你玩晒，都未必有用喎！睇嚟，佢要繼續腦交戰喇。
