政壇：盧文端一錘定音 撐女婿參選立會
今明兩年都係選舉年，政圈商會間嘅執位攻防，暗戰頻頻。我哋早前都同大家講過中華廠商會嘅立法會席位可能有變，傳出挑戰現任代表林大輝嘅名字唔少，當中被視為廠商會青壯派嘅副會長吳永嘉（Jimmy）一直榜上有名，最近，Jimmy同外父、福建幫頭領盧文端一齊現身個活動，被問到兒女未來從政嘅問題，大家長盧文端擺明姿態，祝福女婿Jimmy，話叫Jimmy參選吖！有佢呢句話，嚟緊嘅廠商會立會席位之戰必定精彩咯。
屢傳換代表聲音
政改大戰雖然落咗幕，但好多商會內部仲有唔少餘波，好似廠商會咁，就有一啲聲音對立法會代表嘅表現有唔同睇法，換人做做看嘅消息，亦不脛而走。之前嘅說法係，廠商會前會長施榮懷都係大熱人選之一，不過，傳傳吓，廠商會改選落幕，穩膽依然係Jimmy，知情人士都話，一個名字如果由頭跑到尾，起碼證明跑嘅人有心，啦啦隊都有心喇。
咁Jimmy會唔會從政呢？佢本人一直避談，費事畀人抽秤，甚至話佢偷步競選，或要計算競選開支等。咁佢身邊嘅人又點睇呢？
早前盧文端兒子盧金榮接任香港菁英會主席，盧文端高調話要多啲支持個仔服務社群，早幾日仲叫埋Jimmy一齊食飯，幫手打氣，不過，嚟緊呢兩場大型選舉咁緊要，大家自然關心佢哋有冇人從政啦，尤其係盧文端做監事委員會主席嘅一個建制政黨，盛傳有多名政壇「老油條」會退任，由後生仔接手，所以大家關心大家長支唔支持阿仔參選？盧文端聞言後，沉思三秒鐘，笑言「不如叫Jimmy選吖！」即刻將個焦點轉移到盛傳會參選立法會嘅女婿身上。咁明確嘅表態，大家明喇！或者選舉殺到時，Jimmy呢張外父牌仲會幫手拉一啲叔父票都未定。
