城中鏡：打造Q嘜港
喺工業北移下，「香港製造」嘅產品買少見少，業界轉而打造香港優質品牌，一樣好受歡迎。香港工業總會旗下嘅香港優質標誌局（Q嘜）早前舉行三十七周年晚宴，工總主席鄭文聰話喺內地做內銷好難，因為內地客買嘢專揀名牌，君不見咁多內地人來香港購物。佢話多年嚟Q嘜品牌已深入民心，希望日後再做好啲，加多啲環保元素，令Q嘜成為緊貼市場脈搏嘅信心保證。
葉中賢（左起）、關敏怡同工總總裁蘇家碧齊歡聚。
鄭文聰（右）接任工總主席好忙，幸好有女兒鄭凱茵幫手打理生意。
丁煒章（右）獲太太丁鄧慧嫻現身打氣。
內地客追捧
當日政商界名人齊集，包括Q嘜主席丁煒章、工總副主席兼惠家電器董事總經理Daniel葉中賢、昂坪360董事總經理關敏怡等。講到香港品牌受內地客歡迎，Daniel好有心得，事關佢盤家族生意係做家用電器，除咗做代工之外，亦有自家品牌喺內地、越南、馬來西亞同韓國等亞洲國家銷售，其中咖啡機最賣得。佢話內地人對香港品牌確係好有信心，但佢哋喺上海做咗十幾年，上海人又當佢哋係上海品牌喎。
仁濟醫院前主席Susan蘇陳偉香話佢剛成立嘅自家紙尿片品牌亦攞到Q嘜認證。Susan話兩年前已睇好紙尿片市場，於是喺內地建立全自動廠房並申請Q嘜認證。經過一連串嚴謹嘅品質化驗、視察廠房生產環境同流程等，終於成功躋身Q嘜品牌。現時紙尿片喺內地已有得賣，遲啲就會喺香港銷售。Susan老公蘇啟聲笑笑口話要努力啲，明年攞埋Q嘜人氣品牌大獎添！
