各黨派都想喺明年立法會選舉攞多啲議席，而富貴黨想爭多個直選議席嘅野心路人皆見，由佢哋嘅立法會議員「田少」田北俊不斷抽水，到該黨主席鍾國斌近日言論突然惹火，都知該黨想以攻擊建制派嘅手段，爭取更多選民支持，而政界一直有傳該黨策略係「調區多一席」。該黨內部估計今年區議會選舉，港島區有機會贏多一、兩席，如果明年立會選舉由田少空降港島區，加上名氣同支持度，估計有機會贏一席。
但該黨喺一二年立會選舉，由劉健儀排頭位出戰港島區只得一萬七千幾票，同最低票當選嘅工聯會王國興相差成一萬票，加上明年立會港島區議席「七變六」，難道單憑田少所謂嘅名氣，或坐電車「抽水」兩句，就可以搶到成萬幾票？
劉健儀知名度較低
如果田少落實空降港島區，其新界東議席就要搵人頂替。該黨內部認為鍾國斌今屆先選到紡織及製衣業界議員，需同選民交代，好應該選多次功能界別，所以唔會轉戰直選。至於劉健儀知名度較高，最適合頂替田少嘅新界東議席，黨內仍極力游說劉健儀參選，但即使佢肯空降新界東，計番知名度明顯低過田少好多，議席隨時拱手相讓畀其他黨派。一減再減之下，想耍聰明、貪多席，好可能「貪字得個貧」，連僅有嘅一個直選議席都保唔到。
田少回應話，立會選舉安排要留待十一月區議會選舉之後先有最後定案。至於如此調動，會唔會一個直選議席都保唔到，佢指要睇民調再作定論。問佢有冇信心出戰港島區可贏得議席？佢話「民調so far ok」。過分自信會唔會變成龜兔賽跑翻版、輸得好慘呢？
第一手消息請下載on.cc東網
