單係行去閱兵現場嘅一段路程，已令政商界名人疲態盡現。（受訪者提供圖片）
大約三百名政商界名人尋日朝早喺北京參加紀念抗戰勝利七十周年閱兵儀式，唔少人都喺社交網站上載相片，但原來風光背後係要付出好大體力。話說閱兵儀式未開始前，佢哋要由落車地點步行一小時到閱兵現場，個個似乎行得好辛苦，抵達時連樓梯位都爭住坐，一條樓梯逼滿政商界名人呢個畫面，真係難得一見。
由第一排數上去，社會服務發展研究中心主席邱浩波遞緊部電話出去，似乎係想叫人幫佢影相；佢身後嘅工聯會立法會議員黃國健就忙住玩電話；隔籬戴住黑超嘅飲食界議員張宇人睇落去索晒氣咁款，同樣戴黑超兼紅色鴨嘴帽嘅保險界議員陳健波仲誇張，直頭用手捉實欄杆。油尖旺區議會副主席高寶齡就拎住把黃色扇撥涼，十分搶眼；其餘仲有白鴿黨狄志遠、獨立議員謝偉俊同港交所主席周松崗等。
政制及內地事務局局長譚志源似乎就精力充沛，周圍同人玩自拍，搭車時連財經事務及庫務局局長陳家強都唔放過，而且表情多多添！譚志源話閱兵後搭車返酒店梳洗更衣，夜晚仲要欣賞文藝表演，行程認真緊密。另一議員葛珮帆亦係「集郵王」，先後同警務處處長盧偉聰、浸會大學校長錢大康同科技大學校長陳繁昌等合照。
第一手消息請下載on.cc東網
