政壇：場刊甩轆 誤當卿姐「出櫃」

話說場刊第一句就指卿姐「是香港首位出櫃的政治人物」，之後嘅介紹內容就提起「出櫃」議員「慢必」陳志全，除咗介紹慢必有電台工作經驗外，仲喺一二年代表人民力量參選立法會新界東直選，整段描述都係關於慢必。再睇場刊入面嘅節目表，原來慢必都係嘉賓之一，只係同卿姐嘅出場時間唔同，好明顯係場刊出錯。

大會職員喺論壇差唔多開始時先發現場刊出錯，即時派人收回場刊，仲重新印製及派發。事後主辦單位承認係一時疏忽，唔小心將資料調亂。進念二十面體可能唔係經常舉辦大型公開活動，點知一搞就「甩轆」，唔知卿姐知道後會唔會嚇親呢？

卿姐喺活動後表現得好大方，話唔介意主辦單位出錯，笑笑口話「唔小心出錯啫，無所謂啦！」卿姐仲透露，民政事務局局長劉江華約咗佢今日食早餐，會談及民政事務同文化政策等議題。