泛民主派一直依賴民主動力協調區議會選舉嘅參選名單，之前白鴿黨同新民主同盟就因為協調不成而互相駁火，新同盟嘅立法會議員范國威仲大鬧白鴿黨大蝦細。近日落實嘅協調名單中，白鴿黨決定喺將軍澳軍寶選區讓路畀新同盟Jacky黎銘澤，而白鴿黨嘅社區主任陳展浚就會改落富君選區。不過，陳展浚似乎唔滿意黨嘅決定，更加揚言已經預備好唔用白鴿黨名義出選添！

陳展浚話，獨立泛民嘅富君選區原區議員陸平先係佢嘅師傅，為咗唔打自己師傅，佢傾向參選軍寶選區，仲批評協調機制解決唔到問題，依家會依賴泛民前輩同新同盟協商。對於白鴿黨講到明唔會支持協調名單以外嘅人參選，佢就話預備好唔用白鴿黨名義出選，已經搵咗白鴿黨嘅立法會前議員鄭家富同公文袋楊岳橋嘅支持，有機會改以將軍澳民生關注組名義出選，最遲今個月中會有決定。

尹兆堅話或有變數

白鴿黨副主席尹兆堅就話，堅持尊重協調機制，規定上如果陳展浚一定要出戰軍寶選區嘅話，就要退黨，但佢覺得由現時去到報名都有機會出現其他變數。

除咗提過嘅黎銘澤同陳展浚外，原來「哪吒」方國珊支持嘅律師黃天佑、新寶城業主立案法團主席李國培，同將軍澳業主委員會主席李新都有意參選該區，一個小小嘅選區竟然引嚟五方嘅人爭議席，喺呢場混亂之下，真係難以估計會鹿死誰手嘞！

第一手消息請下載on.cc東網iPhone/iPad/Android/Windows Phone Apps