城中鏡：童心解千愁
近排股市狂冧加上經濟不景，好多人愁眉不展。家族做珠寶生意嘅「朱古力公主」王淑筠（Diana）都唔例外，事關佢接班打理嘅珠寶店開咗二十幾年，幾個月前因業主加租一倍而被迫結束零售，焗住搬上寫字樓，幸好有一班熟客支持，生意都唔差。
王淑筠展示佢好鍾意嘅《我愛我的家人》畫作。
周瑋瑩（左）、張朱秋慧（中）及時裝品牌高層Kim（右）齊為愛心繪畫比賽盡一分力。（受訪者提供圖片）
香港保護兒童會啲小朋友及家人喺朱古力店內參加畫畫工作坊。（受訪者提供圖片）
市道唔好，Diana認為企業更加要做多啲善事，為社會散播正能量。所以佢最近就忙於同香港保護兒童會（兒童會）合辦一場兒童繪畫比賽，另一間國際知名時裝品牌亦有贊助。Diana話，孩童純真嘅笑容最容易令人忘卻煩惱，所以早前佢同香港保護兒童會籌款委員會主席周瑋瑩傾起點樣籌款幫助兒童會時，決定舉辦一場「何謂愛？」嘅兒童繪畫比賽，並邀請知名畫家張朱秋慧擔任評審。
得獎作品製朱古力禮盒義賣
育有一對子女嘅Diana盛讚今次參賽嘅畫作水準好高，佢嘅一對子女都有參加，不過就冇獲獎。其中佢最鍾意嘅一幅畫係《我愛我的家人》，三歲半嘅小畫家筆下一家四口笑哈哈，令人望見就好自然會心微笑。Diana話，佢哋收到好多充滿童真嘅畫作，經過一輪評選後，得獎作品將會印製成精美朱古力禮盒及布袋作慈善義賣。呢批畫作亦將於下周二開始，喺灣仔合和中心地下展出，直至九月底為止。
除此之外，上個月Diana亦邀請兒童會嘅一班小朋友及家人，到佢開嘅朱古力店參加畫畫工作坊。期間小朋友們一邊畫畫，一邊食朱古力及雪糕，真係開心到飛起。Diana望住小朋友玩得咁盡興，又有咁得意嘅畫作，就算做少一日生意都一樣咁開心。
