政壇：搞搞政：港大風波愈搞愈禍 金刀梁捉蟲

校友關注組5動議高票通過

今次總共有九千二百幾張選票，但「支持十大院長聲明」嘅動議只得一千八百幾票支持，遠遠未達過半數票而遭否決。反觀由港大校友關注組提交嘅五項動議，就分別獲超過七千票而通過，搞到港大畢業生議會要喺一至兩個月內成立工作小組跟進議案。有消息話，反對校委會陣營嘅校友前晚行動經過精心策劃，會場內有不少人手持一張投票須知，而一批包括立法會議員在內嘅泛民主派核心校友早就喺會場內各有分工，場內更有人負責發言煽動群情，亦有人負責在發言者發言時報以掌聲或噓聲以壯聲勢。消息仲話，力撐院長聲明嘅校友只得幾個人，有人發言時更被反方喝倒采，甚至被中止講話及粗言穢語人身攻擊。

呢個結果一出，「等埋首席副校長」嘅做法再難延續，依家全世界睇住今個月舉行嘅校委會會議，睇吓班校委係咪會否決陳文敏做副校長，金刀梁唔頭痕就好難喇。