政壇：劉展灝三仔爺 齊探愛駒
踏入九月，學生哥已經開學，連馬季開鑼都進入倒數期，早前練馬師沈集成為旗下馬房舉行拜神儀式，唔少名人馬主都親自入馬場一趟，當中包括生產力促進局主席劉展灝、大仔劉燊濤及細仔劉燊霆三仔爺。
劉展灝（左起）、劉燊濤及劉燊霆齊探愛駒「彪型勁漢」。
劉展灝平時忙到飛起，呢一日都抽空入馬場，探吓愛駒「彪型勁漢」，仲餵佢食草添，難得嘅係佢哋三仔爺呢日到齊，真係對愛駒好有心。
睇完愛駒之後，劉燊濤都同我哋分享佢照顧半歲仔仔嘅心得，呢個廿四孝爸爸真係唔話得，無論沖涼、換片或餵奶，樣樣都識做。
劉燊濤仲話，好彩仔仔已經戒咗夜奶，最辛苦嘅時間已經過咗喇！似乎佢早排經常半夜起身，搞到佢無覺好瞓，所以家吓咁感慨。
