政壇：黃之鋒執水尾敗家
佔領一周年臨近，學民思潮又發起學生自救行動！唔通要發動第二次佔領？甚至搞革命宣布香港獨立？原來唔係，佢哋只係執水尾，想喺鉛水風波中抽水，事關佢哋整咗個「中學生自發驗鉛水計劃」，只要中學生填妥表格，同埋提交自行喺學校抽取嘅五個水辦，學民就會免費幫他們攞去生產力促進局做化驗。早前有中學埋怨驗鉛水要成幾千蚊，唔知學民呢個財大氣粗嘅計劃要使幾多錢呢，雖然佢哋手頭大把錢，但太敗家都好易折墮o架。
學民召集人黃之鋒以前出名轉數快、多諗頭，眼見啲政黨幫居民抽驗家中食水有無含鉛，學民都出招，免費幫全港中學生抽驗校內水辦，由政治搞到民生，唔知佢係咪知道政治口號嗌唔響兼冇人騷，轉行民生路線呢？不過，政府前日先宣布幫全港幼稚園驗鉛水，搶咗頭啖湯，啲政黨更加早已做咗，學民今次跟風抽水，真係執輸行頭兼分分鐘敗家呀。
名額有限或二十個
根據佢哋fb嘅資料，「中學生自發驗鉛水計劃」可以任由中學生參加，每間中學五個水辦，若參加者多嘅話，水辦數目都可觀。學民其後先講名額有限，有說得二十個喎，如果係咁，即係最多幫二十間中學免費驗啫，但佢哋話要使成萬蚊喎。雖然話，學民大把錢，今年七一遊行總籌款額大跌近四成，佢哋仍然有幾十萬元落袋，多過好多泛民政黨，再加埋之前數年的巨額捐獻，絕對夠錢燒，但係佢哋嗰個抽水計劃都太粗疏及膚淺囉。
事關學民要參加嘅中學生自行喺學校抽取水辦，抽取水辦到檢驗係有專業規定o架，一旦水辦污染就會影響結果，何況，學生咁做又需否先行取得校方同意呢？最驚有人搞搞陣，污水當食水咁，唔止玩殘學民，仲玩埋生促局添，到時就笑話嘞。
