城中鏡：內地科網巨頭拍劇鬥戲

內地有套90後喜劇《我在夢想大道東》，呢排剛喺廣州roll機開拍，套劇應有嘅都有晒，包括青春、熱血、勵志、浪漫、愛情。

嗱，連你估唔到會有嘅，一樣有，就係聽講會客串嘅包括小米董事長雷軍、華為創辦人任正非，連阿里主席馬雲都有份。乜唔係話青春劇咩，點解？嗱，皆因套劇係講90後電商創業故事，咁就幾順理成章。

套劇嘅主角當然係有幾青春可人得幾青春可人，但識睇一定係睇馬雲，魅力同受關注度，贏晒啲高顏值嫩男，完全打破「你的樣子如何，你的日子也必如何」呢個真理。

做埋生招牌

內地科網大佬一個二個爭住粉墨登場，已經唔係今日嘅事。雷軍早前就拍咗人生第一部電影，就係同黃曉明合拍嘅國產「教父」，三月嗰陣，仲急不及待喺自己微博晒過自己個「教父」Look。

仲有，奇虎360董事長周鴻禕亦喺科幻電影《三體》客串，扮軍事專家，套戲聽講仲拍緊。搜狐主席張朝陽直頭落場搞埋笑，有份演出佢哋搜狐自己出嗰套《煎餅俠》。

班大佬爭住出嚟拍劇拍戲，點只係為咗自high，實情係自己炒人氣做生招牌，好過花錢請明星賣廣告，仲未計植入自家產品添。所以話，內地科網係場戲，混得掂全靠好演技。你敢話唔係！