城中鏡：盧文端 楊孫西酒逢知己

李曠怡 趙式浩「飲個氣氛」

早前有一批愛酒之人出席咗一個展覽暨晚宴活動，期間，楊孫西講起佢首次與酒結緣，原來係佢第一年出嚟社會工作，當時佢跟老闆應酬，年少嘅佢自此就對茅台印象深刻。

但楊孫西同時仲自爆，飲完酒之後會變得比平時更幽默同健談，連平時唔想講嘅嘢，都會講埋出嚟，所以有乜嘢秘密想問，呢個時候記得要問佢喇！至於身旁同為「福建幫」頭領嘅施子清，自言年紀大咗，近六年飲完酒都有啲敏感，所以最近都少咗飲嘞！

展覽現場又展出唔少特別設計嘅酒樽，一向收藏唔少靚酒嘅保良局前主席鄭錦鐘透露，早前發現有朋友專做「個性化」訂製嘅茅台，可以度身訂造一支屬於自己嘅茅台，除咗樽身寫有佢全名，仲可以親自挑選酒樽上提字嘅字句，認為好有收藏價值。

同場仲有菁英會成員潘凱特、李曠怡同王智誠、卓能集團非執董趙式浩同「香港手套大王」詹氏第二代Kelly詹嘉莉等人，其中李曠怡同趙式浩異口同聲話，飲酒其實係「飲個氣氛」，享受同朋友歡聚嘅時間；近年涉足美容界嘅Kelly，就啱啱喺新疆返港，正開拓適用於唔同城市或省份天氣嘅化妝品。