政壇：搞搞政：論港大衝擊 石永泰變Anger
近期有一套動畫掀起各方熱烈討論，故事講述每人由幾種情緒影響或指揮日常生活，不論大小朋友都有共鳴或反思，連大律師公會前主席石永泰都唔例外，佢話做咗兩次測試，自認係「阿躁」（Anger），即為人易怒，其後即時上身，就港大副校長任命風波開腔，而且各打五十大板，批評港大校務委員會同學生代表均有做得唔合理嘅地方，認真火氣十足。
港大學生會會長馮敬恩等學生及一批示威者喺七月底衝擊港大校委會會議，引起社會批評及質疑，及至八月下旬嘅校委會會議，校委會決定不再「等埋首席副校」，主席梁智鴻指本月會討論副校長人選建議，適逢港大畢業生議會會議今日舉行，預料支持盡快任命副校長同支持十大院長聲明嘅陣營會有一場角力。
港大法律學院尋日舉行開學禮，自稱三十年前入讀法律系嘅石永泰喺發言時，先把話說在前頭，指今日冇打算參與港大畢業生議會會議，亦冇打算投票，所以可自由講句公道說話。
校委會與學生 各打50板
佢就港大副校長任命風波，對校委會同衝擊學生各打五十大板。佢先批評校委會「等埋首席副校」嘅決定，形容係有違常識，又指如果覺得唔同意有關人選，一係就向遴選委員會退回人選，又或拒絕任命。
跟住佢又批評學生都有唔啱嘅地方，強調學生做嘅行動要有正當性，如果要以反抗「制度暴力」為理由，衝入校委會會議，係好危險嘅事，直言兩個錯誤係唔會令件事變得正確。不過，對於學生嘅行為持唔同意見就畀網民批評，佢認為兩極化嘅社會令佢好失望，情況同佔領行動後期其實都好相似。
儘管石永泰口講自己有憤怒基因，又意有所指，話識嬲都係一件好事，仲叫港人要珍惜憤怒嘅機會。之後佢話題一轉，同一班嚟自內地嘅學生講，香港比內地資訊自由好多，至少香港唔需要翻牆先可以睇唔同網頁，希望佢哋可以利用優勢。由此可見佢都有樂觀嘅一面！
