「萬里長城長又長，我倆友誼比它長」、「黃金堅，鑽石堅，不及我倆友誼堅」係以前紀念冊嘅金句。今時今日，內地互聯網發展成宇宙最強，連人脈關係都可以量化兼套現。

想借錢，財務機構一般先check你個人信貸紀錄，睇吓你有冇拖卡數、有乜負債咁；內地互聯網金融有新玩法：你有幾信得過？要計「信用分」。點計？除咗一般正路信貸資料外，仲會睇你網上買咗乜嘢金融產品、淘寶淘過幾錢、社交平台填乜學歷、網上打乜game、QQ定位顯示你蒲開邊，仲睇埋你微信朋友圈有乜friend。

啲「信用分」唔單止可以用嚟晒，仲實際有用。只要夠高分，租車、租酒店時可以免按金，連網上申請外國簽證，都可以慳手續，交少啲資料。

呢啲「信用分」，就係個人信用證明。內地「個人徵信」（個人信用證明）業務，以前只有央行獨市，但中央今年年初決定開放，會掟八個民營牌出嚟。個人徵信市場值成一千零三十億人仔，係互聯網金融最大嘅金礦，阿里、騰訊等梗爭崩頭，間間搏命搞甚麼「芝麻信用分」、「騰訊信用評級分」、「考拉分」、「豬豬分」咁。

咁落去，第時為咗買樓易啲上會，除咗要準時找卡數，唔通仲要add番啲「信用分」高嘅friend添？

第一手消息請下載on.cc東網iPhone/iPad/Android/Windows Phone Apps