政壇：劉江華評分低張雲正無人識
香港研究協會最新有關三司十二局嘅滿意度調查顯示，上任滿一個月嘅民政事務局局長劉江華喺三司十二局評分最低，只有一點九六分，喺十二名局長之中評分包尾，比發展局局長陳茂波嘅一點九七分，以及最近被批拒絕為學校驗水嘅教育局局長吳克儉嘅二點零二分仲要低。被網民戲謔為「垃圾桶」嘅劉江華，似乎要想辦法爭取更多人認同其工作。
按最新關於三司十二局嘅調查結果顯示，劉江華（圖）同張雲正分別喺滿意度評分及認識比率上包尾。（資料圖片）
張雲正（資料圖片）
另一名新任局長，公務員事務局局長張雲正評分雖然有二點三九分，喺十二名局長中排名第七，但係不認識比率，以二成四稱冠，其餘局長嘅不認識比率一律只有單位數，睇怕張雲正未來要增加曝光，先有機會令市民對其更為熟悉。
另外，調查同時顯示政府五大項目評分都錄得下跌，其中「提升教育質素」一項大跌零點二八分至二點一四分，調查機構相信同港大副校長遴選風波爭議不斷有關。
