政壇：爭取街市變超市 鄧永昌被翻舊帳
好多區議員都會用「成功爭取」呢句嚟晒政績，公民力量沙田區議員鄧永昌喺今屆區議會選舉嘅傳單上，提到自己曾「成功爭取美田邨興建街市」，但實情係美田邨至今仍未有街市，只有超級市場供市民選購日用品。
鄧永昌最近被人翻舊帳，原因係成功爭取街市變超市。（讀者提供）
對於被翻舊帳，發現早年爭取興建街市變超市，鄧永昌話呢個係「抹黑行動嘅開始」，又話自己對招標過程全不知情，只知房署冇兌現承諾，就此，佢多次喺屋邨管理諮詢委員會上提出質詢，署方嘅解釋係現時消費模式轉變，相信超市、便利店等能滿足市民需求，加上鄰近嘅大圍街市同美林街市出租率未如理想，所以冇喺美田邨興建街市。
鄧永昌其後更為街市兩個字重新定義，認為唔一定係傳統街市先稱得上街市，但同一時間疑「補飛」，話會喺超市租約期滿後，爭取將現址改建為街市，未知當區居民到時又會唔會收貨呢？
