政壇：商界二代有大將之風

古有花木蘭代父從軍，今有天能動力主席張天任因公務在身，由佢千金Annie張楊代父面見傳媒。Annie自爆喺公司未有正式title，依家仲係了解緊公司。

擁有碩士學位嘅Annie喺英國讀企業管理，睇嚟會接阿爸公司棒啦可？點知佢話「仲考慮緊」，未必入阿爸公司做。事關佢對金融有興趣啲，想去外面啲公司睇睇學多啲，想用自己能力創出新天地。阿爸會唔會嬲豬？佢話阿爸好民主，由細到大都唔逼佢。

咁啱，尋日有另一對二代兄妹出嚟擔大旗，就係紀惠副主席湯文亮對仔女湯振傑同湯振玲。紀惠公布旗下跑馬地住宅物業放租記招，兩兄妹第一次全程由自己開記者會，完全唔使阿爸喺度傍住。

阿哥湯振傑其實唔係新手，佢喺第一太平戴維斯已做咗十年，因為紀惠project愈嚟愈多，屋企人又多公職，所以佢今年五月就返紀惠幫手。佢主要跟三億元以下嘅項目。至於阿妹湯振玲，早喺○八年加入紀惠，主要幫手同銀行傾貸款。佢話阿爸教落「租客係衣食父母，代理係朋友」咁話。