政壇：黃之鋒幫襯 的哥唔賞面
仲記得警方早前拘捕多名Uber司機，引發社會對現行的士服務不足嘅討論。學民思潮召集人黃之鋒就喺個人fb貼文，自爆尋日連續兩次被的士司機拒載。有網民留言表示同情，建議佢抄低司機車牌，向運輸署投訴，亦有網民指兩位司機嘅拒載理由極不合理，估計佢哋根本係對人不對事，唔想接載黃之鋒，可能同黃發起佔領行動，影響大批的士司機生計有關，今次可謂自食其果。
家在港島南區嘅黃之鋒喺fb話，尋日落街截的士，想過海去九龍塘又一城，的士司機A聲稱「唔識去」，佢改為要求載佢到九龍塘港鐵站，但係對方仍然堅稱「唔得呀唔得呀，總之我真係唔識去喇！」
既然呢位的士司機「唔識去」，都冇佢辦法。黃之鋒之後再截另一架的士，點知司機B自稱「無時間去九龍」，其後又話「趕住去接個女放學」、「佢病咗要我帶佢睇醫生」等。佢最後惟有落車，但未有交代到底最後點樣過海去到又一城，同埋有冇遲到。
倡的士安裝GPS
黃之鋒自言並唔係特別支持Uber，因覺得Uber啲車太貴，但佢認為所有的士司機都應該安裝GPS，以便接載乘客到自己唔識去嘅地方。佢又話過往曾經遇過一位的士司機，竟然連出咗紅隧後點樣駛去旺角都唔識，最終去咗長沙灣，再兜咗個大圈，先至抵達目的地。
有網民留言指兩位的士司機嘅拒載理由唔合理，如果單純唔識路，只須要call上台問就可以解決，質疑「因為你是黃之鋒所以就……」網民又話的士司機都是「藍絲」居多，拒載事件完全不難理解。
