誰明老師心：一句撻着老師怒火大賽

最近網上流行一個名為「一句撻着xx怒火大賽」遊戲。我也湊一湊熱鬧，臚列一些「撻着老師怒火」的說話。

學生：「『搣匙』，你都冇講做邊幾頁！」

老師：手冊明明寫住都賴？唔記得做咪唔記得做囉，使死？

學生：「『搣匙』，補習社阿sir唔係咁講o架喎！」

老師：（確認自己冇錯後）咁點解你唔淨係去補習呢？

學生：「『搣匙』，咁多測驗想測死我哋咩！」

老師：錯喇，其實我係有自殘傾向，測多啲驗想改卷改死自己。

家長：「我有叫個仔溫書o架！但係佢話極唔聽，掛住打機！」

老師：其實一部iPhone都好夠你個仔玩，你唔使再買埋iPad、PS4同XBox返屋企慌佢會悶死。

朋友：「做老師好呀，薪高糧準又多假！」

老師：放假唔使做咩，改簿備課補課寫報告帶遊學團乜乜乜，圍起嚟同一般打工仔差唔多假，仲有老師冇雙糧同bonus，拉勻一世大家咁高咁大咋。

上述情況根據真實事件改編，如有雷同，實屬不幸。玩笑開完了，其實要「撻着」我們的事多得不能盡錄，但看到怪獸們傻更更的笑容，怒火好快就會熄滅。各位同工，開學快樂。