城中鏡：東華總理搞花臣行善
百物騰貴，唔少基層都難以維持生活所需，東華三院日前就為基層人士，喺深水埗白田邨設立旗下第二間社區飯堂「膳深軒」，並將於下月投入服務。一班董事局成員尋日齊齊去該飯堂參觀同試菜，副主席王賢誌仲去到廚房親自學整菠蘿冰消消暑，又嘗試估算唔同日用品價錢，組合「百元福袋」，了解基層最常用嘅日用品價格。見班總理搞咁多「花臣」，證明依家做慈善工作少啲諗頭都唔掂。
馮少雲（左）同文穎怡（右）手持本地插畫師為東華設計嘅布袋。
東華三院今年賣旗老土不再，馬清揚都大讚新設計嘅貼紙旗好得意。
王賢誌走入廚房試整地道菠蘿冰。
班總理齊齊戴起圍裙到廚房偷師，原來總理馬清揚都非常熱愛烹飪，話自從當年留學開始就培養咗煮西餐嘅興趣，煎牛扒同整卡邦尼意粉更係最拿手，相反太太就愛煮中餐，所以閒時兩公婆可以輪流做家中大廚。佢又話有時收工太攰唔想落廚，但一聽到仔女話佢整嘅意粉好食過街外餐廳，佢就即刻成個冧晒，滿足感好大。
賣插畫旗變潮物
同場仲有總理Stella馮少雲、Ginny文穎怡、曾慶業同鄧明慧。講番現時佢哋做慈善工作嘅模式要不斷革新，Ginny又話東華今日嘅賣旗活動都同過往有所分別，支旗唔再係好似以前老老土土得個院方標誌，而係搵咗本地人氣插畫師Plastic Thing合作，將支旗設計成一張靚靚貼紙，買咗之後可以長貼喺自己鍾意嘅物品上面。
身為北京同仁堂福明堂中醫藥中心董事總經理嘅Stella透露，近期正研究以中醫藥製作美容產品，事關好多中藥除咗醫病及調理身體外，仲有美顏作用，希望可以開拓本地中醫藥美顏市場，夠晒天然。
