政壇：跪完高官 丘文俊中六合彩
沙田區議員丘文俊早前喺全城清潔運動啟動禮後，跪喺時任署理特首林鄭月娥座駕前請願，要求林鄭接請願信同承諾為水泉澳邨居民全面驗水。雖然林鄭冇理會丘文俊，但佢呢一「跪」，真係跪出「黃金」，果然係「男兒膝下有黃金」喎。
丘文俊早前喺全城清潔運動啟動禮後，跪喺林鄭月娥座駕前請願。
丘文俊跪地請願後，即晚中四個字六合彩。（受訪者提供）
話說跪地請願當日係丘文俊生日，面對跪地請願都冇人接信同理會，佢成日冇晒心機，佢太太就建議不如買張六合彩「沖沖喜」，佢於是買咗兩注六合彩電腦票。豈料十年都冇買過六合彩，竟然畀佢一擊即中，中咗四個字，即五獎獲六百四十元彩金。丘文俊笑笑口話總算攞番個安慰獎。如果佢下次向更高級嘅官員下跪請願，唔知會否中到頭獎呢？
