曾喺區選打敗立法會議員李卓人嘅昔日工聯會小花、現在榮升為「阿珠媽」(師奶)嘅元朗區議員「阿容」劉桂容,喺限期結束前意外發現,其選民登記更新選民登記資料地址「被自動」返回娘家。佢結婚後同老公搬至荃灣麗城花園居住,而且已更改選民登記地址,但竟然喺不知情下被人更改番結婚前位於天水圍天恒邨嘅住址,認真離奇。

劉桂容發現其選民登記地址被匿名人士更改。
(資料圖片)

阿容話今年初向選舉事務處更改選民登記地址至荃灣麗城花園,原本一直相安無事,豈料尋日再次翻查選民登記紀錄時,卻發現其選民登記地址被竄改返回天恒邨,加上該區現任議員係工聯會陸頌雄,佢擔心有人乘機惡意中傷,甚至質疑係「種票」個案。

佢即時致電選舉事務處查詢,先發現有匿名人士喺四月曾修改其選民登記地址,佢已第一時間撥亂反正,改番真實嘅選民登記地址,仲要求索取本年內同佢相關嘅選民登記文本嘅副本。好在佢自行發現「被自動」返回娘家一事,否則被人爆料先知悉,就水洗都唔清嘞!

第一手消息請下載on.cc東網iPhone/iPad/Android/Windows Phone Apps