政壇：搞搞政：譚惠珠低調退黨 免肅貪被抽後腿
「貪曾」前特首曾蔭權爵士「貪盡海陸空、歎盡省港澳」嘅貪腐醜聞，同埋壹傳媒集團前主席「肥佬黎」黎智英向泛民團體及議員秘密捐款醜聞，被查多時至今仍未有下文，外界對專責監督廉署處理重大貪污案件嘅審查貪污舉報諮詢委員會（審貪會）都抱有期望。事有湊巧，政府喺舊年底委任資深港區全國人大代表譚惠珠為新任審貪會主席，當時輿論反應不一，反對任命嘅原因包括佢有鮮明政治立場，加上係建仔成員，因此有戒心。
譚惠珠喺政界打滾近四十年，曾於多個政黨政團出任領導層，其中港進聯喺○五年同建仔合併後，曾喺建仔出任副主席、會務顧問等職位，其建仔背景亦為人熟悉，但外界亦因為佢嘅鮮明政治立場，引起唔少揣測同質疑。
貪曾肥佬黎受關注
有知情人士指譚惠珠接任審貪會主席係順理成章，因佢喺一○年開始加入審貪會出任委員，事隔多年已屬審貪會最資深的一批成員。據知佢舊年底獲委任為審貪會主席前再有不為人知嘅動作，就係辭去所屬建仔內所有職務，而且自行退黨，結束九年嘅黨員生涯。
據聞審貪會主席無政黨背景非法律規定，然而事實擺在眼前，近年不分建制、泛民政黨都不時到廉署舉報個案，況且貪曾嘅貪腐醜聞受到各界關注，肥佬黎秘密捐款醜聞更揭發泛民多個政黨都有成員牽涉其中。據知為免被人抽後腿質疑涉利益衝突，或被質疑未能做到不偏不倚，譚惠珠自行作出退黨決定。建仔最新網頁資料亦顯示，一批有建仔背景嘅港區全國人大、政協名單中，譚惠珠嘅名字榜上無名。
講到底，有人懂得考慮公眾觀感問題是一回事，審貪會最重要是實事求是，做好專責監督廉署處理重大貪污案件的工作，否則市民看在眼內心中有數，由對新人事有期待轉變為失望之時，就真是恨錯難返。
